Tour de France
Frantziako Tourraren Euskadiko irteera

Julin Gorospe: "Mundu osoan ikusiko gaituzte"

Julián Gorospe: "Mundu osoan ikusiko gaituzte"

Julian Gorospek (Mañaria, 1960ko martxoaren 22a) 36 garaipen lortu zituen bere ibilbide profesionalean. Espainiako hamabi Itzuli, Italiako Giro bat eta Frantziako bederatzi Tour korritu zituen.

Gorospe animatuta eta konfiantzaz beterik dago Frantziako Tourra Bilbotik irtengo delako: bilbainada bat gehiago – irribarre egin du –. Uste dut oihartzun handia izango duela. Garrantzitsua da Tourra ia gure atariaren aurrean hastea. Mundu osoan ikusiko gaituzte. Oso polita izango da. Jendea gogotsu dago gure errepideetan txirrindulari handiak ikusteko. Hiru egun polit eta zirraragarriak izango dira eta merezi izango du esfortzuak.

Lasterkari zein zuzendari gisa hainbatetan partaide izan den Frantziako lasterketa ondo ezagutzen duen gizon batek esaten du hori. Bederatzi Tour bizikleta gainean: Dezente - baietz dio Julianek-. Lehenengo Arroyorekin, maila bikainean aritu zena, gero Pericorekin Tour bat irabaztea lortu genuen eta oso garrantzitsua izan zen, urte asko baitziren espainiar batek ez zuela irabazten eta ikaragarria izan zelako, eta gero Indurain etorri zen eta hainbat irabazi genituen. Oso urte onak izan ziren. Gainera, ordura arte nazioarteko lasterketetan bigarren mailakotzat hartzen gintuzten eta hortik aurrera asko errespetatu gintuzten. Asko aldatu zen Reynolds taldeari eta, batez ere, Induraini zioten errespetua, erakutsi zuen boterea ikaragarria izan baitzen. Oso urte onak izan ziren, irabazlearentzat ez ezik, ekipokideentzat ere, berarekin egon ginenok ere errespetatu eta beste era batera ikusten gintuztelako.

Gorosperen garaipenen artean bereziki nabarmentzen da 1986ko uztailaren 23an Frantziako Tourrean irabazi zuen 18. etapa, Greg Lemondek, Bernard Hinaultek lagunduta, irabazi zuen lehen Tourra izan zen hura. “Hasieran etapa bat asko baloratzen zen. Ez zen erraza irabaztea. Pericok Tourra irabazi aurretik, hara joaten ginen etapa bat irabaztera, oso garrantzitsua zen eta garaipen horrek ia denboraldi erdia konpontzen zuen babeslearentzat. Egun hartan Villard de Lansen borroka egiteko gogoz irten ginen Saint Etiennen amaitzeko. Vilamajók, Laguíak eta hirurok erasoa jo genuen. Pim, pam, bata, bestea, baina Hinaultek ez zigun alde egiten utzi nahi, eta bera ere gure bila irteten zen, bigarren mailako mendate batean alde egitea lortu nuen arte. Kolonbiarrek asko estutu ninduen igotzen baina ni sufritzen, sufritzen - asko kostatu zitzaidan – eta azkenean etapa polita irabaztea lortu nuen”, gogoratzen du Gorospe anaietan zaharrenak.

Gorospe bakarrik sartu zen helmugan, baina ez zituen bi besoak altxatu, esku batekin keinu txiki bat besterik ez: “Ez dakit zer egin nuen ere – dio bizkaitarrak –. Hain negoen akitua, 110 kilometro bakar-bakarrik egin ondoren, ezin nuela gehiago. Leherturik iritsi nintzen, baina hurrengo egunean ia 60 kilometroko erlojupekoa zegoen eta Lemondek eta Hinaultek baino ez zuten neuk baino denbora hobea egin. Hirugarren egin nuen, hau da, nahiko ondo ibili nintzen.”

“La Grande Bouclé” egundoko lasterketa izatearen ospea du, paregabea, inguratzen duen guztiagatik: “Tourra beste edozein lasterketaren desberdina da – dio Mañariakoak -. Agian Giroak mendate gogorragoak ditu, baina Tourra desberdina da, uztailean bero handia egiten duelako. Eguzkiak gogor jotzen du eta jende askori beroa gustatzen zaio baina beste batzuei ez hainbeste. Hogeita piku, berrogei gradu, eta eskerrak orain etapak laburragoak direla, berrehunetik beherakoak, baina orduko denboran egiten genituen etapak berrehun, 250 kilometro, hirurehun eta pikukoak ere bai, eta horrek asko txikitzen zintuen”.

Bestalde, lasterketa honetan pizten den lehia handia da:” Mundu guztia doa topera, denek nahi dute etapa bat irabazi, Tourra da; partaide guztien ametsa da lasterketa handi bat egitea eta horretarako garrantzitsuena estresa eta beroa gainditzea da”, gehitu du Julianek.

“Lasterketa inguratzen duen giroa punta puntakoa da. Mundu guztiak jarraitzen du Tourra. Ikaragarria da bertaratzen den jendetza, laguntzen duen karabana, egoten den giroa Ez dago beste lasterketa berdinik. Italian ere animatzen zaituzte eta zaleak oso oso bereziak dira, lasterketan murgiltzen dira, baina Tourrak beste maila bat du alderdi guztietan”, dio txirrindulari ohi bizkaitarrak.

Tourra Frantziako lasterketa nagusia da, frantziarrek maite eta jarraitzen dutena, urteko gainerako lasterketetan egiten ez dutena: “Tourrak jende asko mugitzen du. Lasterketa barruan eta kanpoan. Ikusten da prezioen mugimendua Bilbo aldeko hoteletan. Frantsesak ez ezik, hemengoak, eta alde guztietatik etorriko dira datorren edizioaren hasiera ikustera. Tourra lehenengo egunetik eta azken egunera arte jarraitzen duen jendea dago, eta zaleak leku guzti-guztietan murgiltzen dira. Tourrak masak mugitzen ditu. Hemen berdin gertatuko da, ziur», amaitu du Julian Gorospek.